അവള്

പുകഞ്ഞുപൊന്തുന്ന ആത്മരതികളുടെ
അട്ടഹാസങ്ങൾ തിരസ്കരിച്ച്-

സ്വപ്നങ്ങളുടെ ആത്മാക്കളെ മോക്ഷമില്ലായ്മയിൽ തളച്ച്-

വാക്കുകൾക്ക് മൗനങ്ങളുടെ
അവസാനമില്ലാത്ത ഇടവേളകൾ നൽകി-

പ്രണയത്തിന്
ഹൃദയഭ്രഷ്ട്ട് കൽപ്പിച്ച്-

വികാരവേലിയേറ്റങ്ങളെ
ആത്മാവിലാവാഹിച്ച്-

ഒരു തീയിലെല്ലാം എരിച്ചുകളയാൻ,
ഒരു താണ്ഡവനൃത്തത്തിൽ എല്ലാം തകർക്കാൻ-
ഒന്നാർത്തട്ടഹസിക്കാൻ-
തക്കംപാർത്തിരിക്കുന്നൊരു-
ദാരിക രക്ത ദാഹിയായ കാളിയെ
അവളുള്ളിലൊളിപ്പിച്ചു-
ചങ്ങലക്കിട്ടുവെച്ചിരിക്കെയാണ്.

നീയില്ലായ്മ

ചിന്തകളെല്ലാം നിന്നിൽനിന്നും പറിച്ചുമാറ്റി നട്ടിട്ടും.....

ഒരിറ്റു രക്തം പോലും ചിന്താതെ എന്റെ ധമനികൾ നിന്നിൽ നിന്നും മുറിച്ചുമാറ്റിയിട്ടും......

നിന്നിൽ വേരാഴ്ന്നിറങ്ങിയ എന്റെ ഗുൽമോഹറിന്റെ ചില്ലകളെല്ലാം
അറുത്തുമാറ്റിയിട്ടും....

നിന്നോർമ്മകളെല്ലാം എന്റെ നെഞ്ചിലെ നെരിപ്പോടിനുള്ളിൽ
അഗ്നിയാലാളിയിട്ടും...

അനന്തമായ ആകാശത്ത് നീയെന്തേ വീണ്ടും വീണ്ടും പിറക്കുന്നു!!!!

#കടപ്പാട്: അവൾക്ക്-നന്ത്യാർവട്ടത്തിന്റെ മറുപാതിക്ക്!