സ്വപ്നങ്ങളുടെ ജഡം കാത്തു സൂക്ഷിക്കുന്ന തടവറയുടെ തുരുമ്പെടുത്ത അഴികൾക്കിടയിലൂടെ ദുർഗന്ധം വമിക്കുന്നുണ്ട്...
"എന്താത്...??"
"തൂങ്ങിമരണം ആണെന്ന കേട്ടത്..."
"ഏയ്...കൊന്നതാവാനെ തരമുള്ളൂ..."
"ആര്...?"
"ഉടയോൻ തന്നെ...!"
"എന്താ ചാത്താ ഈ പറയണേ...? ജനനി തന്നെ അവസാനമോ?"
"ഉവ്വ്...മറുതെ... അങ്ങനേം ഇപ്പൊ സംഭവിക്കുന്നുണ്ട്...!
നിരാശയുടെ അഗാധമായ പടുകുഴിയിൽ ആണ് എല്ലാരും...ഒരു ഉയിർത്തെഴുന്നേൽപ്പ് ആരും ആഗ്രഹിക്കുന്നില്ല.
അനന്തമായ ആകാശം കാണുമ്പോൾ വിഷാദത്തിന്റെ നക്ഷത്രങ്ങൾ പൂക്കുന്നതാണവർ കാണുന്നത്...ഇരുട്ടിൽ അവർക്ക് അവരുടെ ജീവന്റെ അവസാന കണികയും അവരെ തള്ളിപ്പറയുന്നത് കേൾക്കുമ്പോൾ അവർ സ്വപ്നങ്ങളെ കൊന്ന് കെട്ടിത്തൂക്കി ആത്മഹത്യ ചെയ്യിക്കാറുണ്ട്.... "
"അപ്പൊ ചാത്താ...ആ ദേഹം എന്തുണ്ടാകും....?"
"രണ്ട് ലോകങ്ങളിൽ അവർ അവരുടെ സ്വപ്നങ്ങളെ കൈയ്യെത്തി പിടിക്കുന്നുണ്ടാകും!
അല്ലെങ്കിൽ ആ ഇരുട്ടിൽ കിടന്ന് അവസാനം പുഴുക്കൾക്ക് ഭക്ഷണമാകും...."
