ദേവന്റെ കത്ത് 3

എന്റെ ചെമ്പകമേ...

നീയിങ്ങനെ പേടിക്കാതെ...ഷാരത്തെ ചെക്കന്റെ കാര്യം ഞാൻ നോക്കിക്കോളാ... നമ്മുടെ കാര്യം ഒന്നും പറയാൻ നിക്കണ്ട, തെക്കേപടിയിലെ കുമാരനോട് ഒന്ന് പറഞ്ഞേക്ക്.. ഞാൻ ഓന് കത്തയച്ചോളാ വിവരം പറഞ്ഞിട്ട്...

പിന്നെ ഗുരുവായൂര് പോയിട്ട് എന്താ പറഞ്ഞേ കണ്ണനോട്..?

മൂപ്പരോട് ഒന്ന് കനിഞ്ഞു സഹായിക്കാൻ പറ... ഇല്ലേൽ കാര്യങ്ങളൊക്കെ കൊഴയും...വാങ്ങിയത് ഞാൻ അങ്ങു വരുമ്പോൾ നേരിട്ട് തന്നാൽ മതി ട്ടോ!!

ഇന്നലെ പ്ലാസ്റ്റർ വെട്ടി, നടക്കുമ്പോൾ ചെറിയൊരു ബുദ്ധിമുട്ട് ഉണ്ട്...നാളെ ഓഫീസിൽ പോണം...സാലറി തീയതി ആവാറായില്ലേ!!. 

കഴിഞ്ഞ മാസത്തെ വീട്ട് വാടക കൊടുത്തിട്ടില്ല്യ...ജെയിംസ് നാട്ടിലേക്ക് പോയി കഴിഞ്ഞ മാസം, പുതിയ ഏതോ ജോലി ശരിയായത്രേ....പിന്നെ റെഡ്ഢി അവന്റെ കല്യാണം കഴിഞ്ഞിട്ട് ഇതുവരെ എത്തിയിട്ടും ഇല്ല്യ... മൊത്തത്തിൽ ഞെരുക്കത്തിൽ ആണ്...ഓഫീസിന്റെ അടുത്ത് മുറി നോക്കണം ഇനി എന്തായാലും...വീട്ടിലേക്ക് പൈസ അയച്ചിട്ട് രണ്ടുമാസം ആകാറായി.. ഓപ്പോൾക്ക് ഒരു മൂക്കുത്തി വാങ്ങണം എന്ന് വെച്ചിട്ട് ഇതുവരെ നടന്നില്ല!!! 

അമ്മേടെ കാലിലെ നീര് ഇതുവരേം കുറഞ്ഞില്ലെന്ന് കഴിഞ്ഞ കത്തിൽ ഓപ്പോൾ പറഞ്ഞിരുന്നു... പാവം ഓപ്പോൾ എത്രയായി ഓടുന്നു...പാരലൽ കോളേജിലെ പൈസ അമ്മയുടെ മരുന്നിന് തന്നെ തികയാറില്ല... അതും കൂടാതെ ട്യൂഷനും ഒപ്പം തയ്യലും ഒക്കെ കൊണ്ടുപോവുന്നുണ്ട്!!! 

ചൊവ്വാ ദോഷത്തിൽ തളച്ചിട്ട് ആ പാവത്തിന്റെ ജീവിതം ഇങ്ങനെ തീരുമെന്നാണ് തോന്നുന്നത്...

ആ പിന്നെ നിന്റെ കോളേജിൽ ചേരുന്ന കാര്യം ഒക്കെ എന്തായി...തൃശ്ശൂർക്ക് ഒക്കെ വിടുമോ നിന്റെ പിതാശ്രീ?

അച്ഛമ്മ എന്തു പറയുന്നു? ന്നെ അന്വേഷിക്കാറുണ്ടോ?

 

ഇവിടെ ഇപ്പൊ മഴ കുറഞ്ഞിട്ടുണ്ട്...ജനലിന്റെ ചില്ല് മാറ്റിയിട്ടു! വെറുതേ ഇരിപ്പായ കാരണം തടി ഇത്തിരി കൂടിയോ എന്നൊരു സംശയമുണ്ട്...

ആ പിന്നെ പറയാൻ മറന്നു..,ദേവു ഓപ്പോൾക്ക് എന്തൊക്കെയോ സംശയങ്ങൾ ഉള്ളപോലെ തോന്നുന്നു...അഥവാ എന്തേലും ചോദിച്ചാലും നീയായിട്ട് ഒന്നും പറയാൻ നിക്കണ്ട കേട്ടല്ലോ!!!

അപ്പൊ നീട്ടുന്നില്ല...സന്തോഷമായിട്ടിരിക്കണം ട്ടോ!!!

ഇനി വിശേഷങ്ങൾ അടുത്ത കത്തിൽ...

ദേവേട്ടൻ!

ശ്രീക്കുട്ടിയുടെ കത്ത് 2

എന്റെ ദേവേട്ടന്,

ഇന്നലെ ഗുരുവായൂര് പോയിരുന്നു... കൊറീസായി അച്ഛമ്മ പോണം ന്ന് പറയുന്നു..അപ്പൊ അച്ഛൻ കൊണ്ടോയി..

ഞാൻ ഒരൂട്ടം വാങ്ങീണ്ട് ദേവേട്ടന് തരാൻ

എന്താന്ന് പറയണില്ല വരുമ്പോ കാട്ടിത്തരാം...

ലക്ഷ്മി അക്കയെ അന്വേഷിച്ചൂന്ന് പറഞ്ഞേക്കൂ....അക്കയുടെ ഭക്ഷണം എങ്ങനെ ഉണ്ട്..എന്റെ അത്ര വര്വോ???

പിന്നേയ്.... ആ ജയയോട് അധികം അങ്ങോട്ട് ഒട്ടാൻ നിൽക്കണ്ട കേട്ടല്ലോ!!?

പ്ലാസ്റ്റർ വെട്ടിയാൽ കുറച്ചു ദിവസം കൂടി കഴിഞ്ഞിട്ട് ഓഫീസിൽ പോയാൽ മതി ട്ടോ..കാർത്തി പണി എടുക്കട്ടെ കുറച്ചീസം കൂടി. 

മഴ കൊണ്ട് പനി വന്നൂന്ന് പറഞ്ഞെങ്ങാൻ എഴുതിയാൽ വിവരം അറിയും പൊന്നുമോൻ...ഹാ സൂക്ഷിച്ചോളുണ്ട്!!

അതേയ്.. പിന്നേയ്.... ദേവേട്ടൻ ദേഷ്യപ്പെടില്ല്യാച്ച ഒരു കാര്യം പറയാം...ഷാരത്തെ അപ്പു ഇന്നാള് എനിക്ക് ഒരു കത്ത് തന്നു ഞാൻ വാങ്ങീല്ല്യ.. കൊറേ ദിവസമായി പൊറകേ കൂടീട്ട്.. ഞാൻ കണ്ടില്ല്യാന്ന് നടിച്ച് വഴി മാറി നടക്കുവായിരുന്നു..എന്താ ചെയ്യാന്ന് ഒരു പിടീം ഇല്ല്യാ.. നമ്മടെ കാര്യം പറഞ്ഞാലോ?? ഒരു മറുപടി എത്രേം പെട്ടന്ന് അയയ്ക്കൂട്ടോ!!!

കാത്തിരിക്കുന്നു..

ശ്രീക്കുട്ടി.

ദേവന്റെ കത്ത് 2

എന്റെ ശ്രീക്കുട്ടിക്ക്,

ഇവിടെ മഴ തോരുന്നില്ല... ഓട് കുഞ്ഞപ്പൻ ചേട്ടൻ മാറ്റിയിട്ടു...ചില്ല് മാറാൻ കുമരേശൻ വരാന്ന് പറഞ്ഞിട്ടുണ്ടായിരുന്നു അവനിതുവരെയും വന്നിട്ടില്ല...എന്തേലും പണി പറഞ്ഞാൽ അപ്പൊ വല്ല മുട്ടു ന്യായോം പറഞ്ഞു മുങ്ങും!. ചോറും കറികളും ലക്ഷ്മി അക്ക വന്നിട്ട് ഉണ്ടാക്കും അവര് വരുമ്പോ തന്നെ ബ്രേക്ക് ഫാസ്റ്റ് കൊണ്ട് വരും മുഴുവനും ഒപ്പം ഇരുന്ന് തീറ്റിക്കും...അക്ക നിന്നെ ചോദിക്കാറുണ്ട്..ദേവൂനെ ഓർമ്മ വരും അക്കയെ കാണുമ്പോ..നിന്നോട് ഓപ്പോൾ എന്തേലും പറഞ്ഞുവോ കണ്ടപ്പോൾ? നാട്ടിലേക്ക് വരാത്തതിന് പരിഭവം ഇണ്ടാവും!!!.. 

നിന്റെ അച്ഛൻ എന്താ പറഞ്ഞേ തുടർന്ന് പഠിക്കാൻ സമ്മതിച്ചോ? ആർട് ഒക്കെ എങ്ങനെ പോകുന്നു? 

സ്വപ്നങ്ങളെ തേടാൻ പറയുന്നില്ല...സ്വപ്നങ്ങൾ ത്യജിച്ചവന് അതിനർഹതയില്ലല്ലോ!!!

പിന്നെ നാളെ പ്ലാസ്റ്റർ വെട്ടും...എന്നിട്ടുവേണം ഒന്ന് പുറത്തിറങ്ങി മഴ കൊള്ളാൻ...

ഓഫീസിൽ എന്റെ പണികൂടി കാർത്തി ആണത്രേ ചെയ്യുന്നത്...ഇന്നലെ ജയ വന്നപ്പോ പറഞ്ഞതാണ്....

നല്ല വിശപ്പുണ്ട്...ടേബിളിൽ ചോറും കറീം അക്ക വെച്ചിട്ടുണ്ട്...ന്നാ ഞാൻ പോട്ടേ ട്ടോ!!!

മറുപടി അയക്കാൻ മറക്കരുത്...

സ്വന്തം ദേവേട്ടൻ.

ശ്രീക്കുട്ടിയുടെ കത്ത് 1

 എന്റെ ദേവേട്ടന്,

അമ്പലത്തിൽ പോണ വഴി ദേവു ഏടത്തിനെ കണ്ടിരുന്നു...

കാര്യങ്ങൾ ഒക്കെ അറിഞ്ഞു... രണ്ട് തവണ എഴുതിയതാണ് അപ്പോഴേക്കും അച്ഛൻ വന്നു..അതോണ്ട് അത് രണ്ടും കീറിക്കളഞ്ഞു...ഇന്ന് ഉച്ചക്ക് പോയേ ഉള്ളൂ ഗുരുവായൂർക്ക്.

ഇവിടെ ചെറിയ മഴ ചാറൽ ഇണ്ട്...നല്ലോണം ശ്രദ്ധിച്ചാൽ അടക്കിപ്പിടിച്ചു കരയണ പോലെ..തൊടിയിലെ പാരിജാതം പൂത്തു ട്ടോ...പക്ഷേ ചെമ്പകം ഇതുവരേം പൂവിട്ടില്ല!!! അതിന്റെ മണം ആണ് മുറി മുഴോനും...തട്ടിൻ പുറത്ത് അമ്മിണി പൂച്ച പ്രസവിച്ചു മൂന്ന് വെളുത്ത സുന്ദരിക്കുട്ടികൾ...

ഇടക്കെല്ലാം ഒറ്റക്കിരിക്കുമ്പോൾ വല്ലാതെ സങ്കടം വരും...അപ്പൊ കണ്ണീര് പിടിച്ചുവെക്കാൻ പറ്റാറില്ല!!! 

ദേവേട്ടനോട് എത്ര പറഞ്ഞാലും കേൾക്കില്ല്യാച്ചാൽ എന്താ ചെയ്യാ...എന്തിനാ ഇങ്ങനെ ജീവൻ കളഞ്ഞു ഓടാൻ നിൽക്കണേ... ഇനിയെങ്കിലും ഒന്ന് സൂക്ഷിക്കൂ ട്ടോ...

കാല് വയ്യാതെ അവിടെ ഒറ്റക്ക്..ഇവിടെ ഇള്ളോര് തീ തിന്നാണ്... ഞാനേ പോട്ടെ 'അമ്മ വിളിക്കുന്നുണ്ട്... വടക്കേലെ സുനന്ദ വരാം ന്ന് പറഞ്ഞിട്ടുണ്ട് അവളാണ് പോസ്റ്റ് ചെയ്യാറ്..

നിർത്തട്ടെ ഏട്ടാ..

ഉമ്മകളോടെ...

സ്വന്തം ശ്രീക്കുട്ടി.

#എഴുത്ത് നന്ത്യാർവട്ടം വക

ദേവന്റെ കത്ത് 1

എന്റെ നന്ത്യാർവട്ടമേ....

ഇന്നേക്ക് നൂറ്റി എഴുപത്തിനാല് ദിവസമായി നിന്റെ ദൂത് എനിക്ക് കിട്ടിയിട്ട്....നീ എന്നത്തെയുംപോലെത്തന്നെ പുലരിയിൽ പൂത്തുനിൽക്കുന്നുവെന്നു ഞാൻ കരുതട്ടെ.....

ഇവിടെ രാവിലെ മുതൽ മഴയാണ്...മുറിക്കുള്ളിൽ മുഴുവൻ തണുപ്പാണ്... അപ്പുറത്തെ കുട്ടാപ്പി പൊട്ടിച്ച ജനൽ ചില്ല് ഇതുവരെ മാറ്റിയില്ല...അടുക്കളയിൽ ഓട് പൊട്ടി ചോർച്ച ഉണ്ട്...കുഞ്ഞപ്പൻ ചേട്ടൻ ഇതുവരെ വന്നില്ല മാറ്റിയിടാൻ... കാലിലെ പ്ലാസ്റ്റർ അടുത്താഴ്ച വെട്ടും...അവിടെ ചെമ്പകം പൂത്തുവോ??

മഴയുണ്ടോ അവിടെ? 

കുഞ്ഞപ്പൻ ചേട്ടൻ വന്നൂന്ന് തോന്നുന്നു... നിർത്തട്ടെ!!!!

നിന്നെ ഒരുപാട് മിസ്സ്‌ ചെയ്യുന്നു!!!

ഉമ്മകളോടെ സ്വന്തം ദേവേട്ടൻ!!!